Монгол улсын ерөнхийлөгчийн санаачилгаар зохион байгуулж буй “МӨСТӨЛ, МӨСӨН ГОЛОО ХАМГААЛЪЯ” уриан дор "Цэнхэр алт" Усны үндэсний II чуулган төрийн ордонд амжилттай болж өндөрлөв.
Чуулганд төр, хувийн хэвшил, олон улсын байгууллагын 1200 төлөөлөл оролцож байна.
Чуулганаар Монгол орны уур амьсгалын өөрчлөлтөд дасан зохицоход усны нөөцийн нэгдсэн менежментийн тулгамдаж буй асуудал, усны нөөцийн жигд хуваарилалтыг шийдвэрлэх арга зам, Монгол орны мөстөл, мөсөн гол, цэвдгийн төлөв байдал, хайлалт, өөрчлөлт, ирээдүйн хандлага болон усны салбар дахь төр хувийн хэвшил, мэргэжлийн байгууллагуудын хамтын ажиллагаа, цаашдын зорилтыг тодорхойлон хэлэлцэж байна.
Монгол Улсын Ерөнхийлөгч Ухнаагийн Хүрэлсүх чуулганд хэлсэн үгэндээ уур амьсгалын өөрчлөлт, дулаарлын нөлөөгөөр хуурайшилтын давтамж нэмэгдэж, дэлхийн цэнгэг усны нөөцийн 70 хувийг бүрдүүлдэг мөстөл, мөсөн гол хайлж, цэвдгийн алдрал эрчимжиж байгаа нь тогтвортой хөгжлийн зорилтод томоохон эрсдэл учруулж, ундны усны хүртээмж буурч, дэлхийн 3.6 тэрбум хүн усны хомсдолд өртөөд байгааг онцолсон.
Цаашид энэ тоо 2050 он гэхэд 5 тэрбумд хүрч, дэлхийн хүн амын 40% нь цэвэр усны дутагдалд орох эрсдэлтэй байгааг судалгааны дүн мэдээ харуулж байна.
Монгол Улсын Ерөнхийлөгчийн санаачилгаар зохион байгуулж буй “ЦЭНХЭР АЛТ” усны үндэсний II чуулганд 5 илтгэл.
ҮҮНД:
- ”Монгол орны уур амьсгалын өөрчлөлтөд дасан зохицоход Усны нөөцийн нэгдсэн менежментийн тулгамдаж буй асуудал, шийдвэрлэх арга зам” сэдвээр Усны газрын дарга З.Батбаяр:
- ”Монгол орны мөстөл, мөсөн голын төлөв байдал, өөрчлөлт” сэдвээр Ус, цаг уур, орчны судалгаа мэдээллийн хүрээлэнгийн Гадаргын усны судалгааны хэлтэс, доктор Х.Пүрэвдагва;
- ”Монгол орны цэвдгийн төлөв байдал, ирээдүйн хандлага” сэдвээр Шинжлэх ухааны академийн Газарзүй, геоэкологийн хүрээлэнгийн доктор А.Дашцэрэн;
- “Усны салбар дахь төр хувийн хэвшлийн хамтын ажиллагаа, цаашдын зорилт” сэдвээр “Усны мэргэжлийн нэгдсэн холбоо” дэд ерөнхийлөгч Ш.Ганзориг;
- ”Туул голын өнөөгийн байдал, тулгамдсан асуудал” сэдвээр Туул голын сав газрын захиргааны дарга Б.Билгүүн нар танилцуулга, мэдээлэл хийв.
